Ons Geskiedenis
Skuilkrosies het in 2013 sy deure in die huidige gebou geopen met ’n warm visie om jong kindertjies ’n veilige, liefdevolle leeromgewing te bied. In daardie jaar het ons 143 kleuters in ses klaskamers verwelkom, ’n mylpaal wat die begin van ons groeiende, hegte gemeenskap gemerk het. Sedertdien bou ons voort op dieselfde waardes van sorg, ontwikkeling en kwaliteit vroeë kinderopvoeding wat vanaf die eerste dag ons fondament gevorm het.
Onderwysmodel en benadering
Holistiese benadering
Ons volg ‘n holistiese benadering. Ons kleuters werk in rotasiestasies waar daar gelyktydig ‘n gemiddeld van vier tot vyf verskillende leergeleenthede plaasvind. Ons bekwame, gekwalifiseerde personeel gebruik geïntegreerde leer om ons kleuters te ontwikkel op ‘n speelse, interessante en ouderdomstoepaslike wyse.
Dagprogram
Ons dagprogram is met baie kundigheid en fyn oordeel uitgewerk om te verseker dat elke kleuter optimaal kan ontwikkel en ‘n gelukkige skooldag kan geniet.
Temas en Onderwerpe
Dis uiters belangrik dat ‘n liefde vir ontdekking en leer gekweek moet word en om te verseker dat elke kleuter betrek word by die daaglikse aktiwiteite wat deur die skool aangebied word. Hiervoor gebruik ons temas en onderwerpe, omdat dit outomaties ‘n nuuskierigheid en belangstelling prikkel by die kleuters.
Ontwikkeling
Ons benader elke taak as ‘n ontwikkelingsproses, en werk nie net vir ‘n einddoel nie. Daar sal nie gereeld ‘n inkleurprent of “juffrou werkie” in jou kind se tas wees nie. Somtyds gaan ouers niks huis toe kry nie, want die leerproses het in skeerroom of sand plaasgevind. Voorskoolse kleuters moet skep en kreatief wees en op 3D vlak werk en met verskeie mediums eksperimenteer.
kurrikulum raamwerk
Ons Graad RRRR - Graad RR maats volg die VLOA nasionale kurrikulum raamwerk wat fokus op ses vroeë leer ontwikkelingsareas, naamlik: welstand, identiteit en samehorigheid, kommunikasie, verken wiskunde, kreatiwiteit en kennis en begrip van die wêreld.
Ontwikkelingsmylpale
Daar word geen druk op kleuters geplaas nie, en hul kry die geleentheid om elkeen volgens hul eie tempo te ontwikkel. Daar is egter sekere ontwikkelingsmylpale wat aanduiding kan gee indien ‘n kleuter ekstra ondersteuning benodig. Indien juffrou aanbeveel dat ‘n kind vir ’n spraak- of arbeidsterapie evaluasie gaan, beteken dit dat sy opmerk dat daar addisionele ondersteuning in ‘n ontwikkelingsarea benodig word. Ons wil elke kleuter die geleentheid gee om die beste voorskoolse vaardighede aan te leer wat hy/sy moontlik kan.
Dagprogramme
TYD | AKTIWITEIT |
06:45 - 08:00 | AANKOMS EN VRYSPEL (BINNE / BUITE) |
08:00 - 08:20 | ONTBYT |
08:20 - 08:45 | GROETTYD / REGISTER / NUUS / BYBEL / WEERKAART |
08:45 - 09:00 | BUITESPEL (“ASEMSKEP”) |
09:00 - 09:25 | VERVERSINGS / ETENSTYD |
09:25 - 10:00 | TEMABESPREKING / HOOFAKTIWITEIT |
10:00 - 10:45 | BUITESPEL (“ASEMSKEP”) |
10:45 - 11:30 | PEUSELHAPPIE / STORIETYD |
11:30 - 13:30 | SLAAPTYD VIR PEUTERS |
12:00 | HALFDAG MAATS VERDAAG |
TYD | AKTIWITEIT |
06:45 - 07:45 | AANKOMS EN VRYSPEL (BINNE / BUITE) |
08:00 - 08:40 | GROETTYD / REGISTER / NUUS / BYBEL / WEERKAART |
08:40 - 08:50 | TOILETROETINE |
09:20 - 09:50 | VERVERSINGS / ETENSTYD |
09:20 - 09:50 | TEMABESPREKING |
09:50 - 10:50 | BUITESPEL |
10:50 - 11:50 | HOOFAKTIWITEIT |
11:50 - 12:05 | BUITESPEL |
12:05 - 12:25 | STORIETYD |
12:25 - 12:35 | AFSLUITING EN VERTREK |
verdaagtye
Om werkende ouers wat reeds vroeg by die werk moet wees tegemoet te kom, is daar reeds van 06:45 toesig op die skoolterrein.
Aangesien die opvoedkundige program 08:00 begin, sluit die toegangshekke stiptelik om 07:45 en word eers weer 12:30 oopgesluit.
kommunikasie
U kleuter se gedrag, deelname aan die uiteengesette aktiwiteite en ontwikkeling sal deurentyd objektief waargeneem word en opvoedkundige kommentaar en wenke sal waar nodig, en indien verkies, verskaf word. Aan die einde van ‘n kwartaal ontvang ouers ‘n kwartaalverslag wat duidelik aandui hoe dit met jou kind se ontwikkeling en deelname gaan. Ouerdae bied verdere geleentheid om die kleuters se vordering en enige ander sake, sonder hul teenwoordigheid, te bespreek en ook om inligting rakende die skool te deel.
weekbriefies
Ons werk absoluut ouderdomsgerig, daarom is daar ‘n individuele weekbrief per graadgroep. In die briefie kan ouers duidelik sien waarop daar gefokus word in die klas. Ons vra dat ouers en kleuters deelneem aan ons temas en dat ouers betrokke raak by u kind se leerproses en ontdekkingsreis. Ouers is welkom om voorstelle te maak of self iets te kom aanbied by die skool wat verband hou met ons temas.
